يا عروسة

يا عروســـة


يا عروســـة إلبسى توب الحداد
بدلى فستانك الأبيض سواد
وإقلعى الطرحة اللى فوق راسك
ده الحزن جاى من غير معاد
الحزن جاى من غير معاد


يا عروســـة إلبسى التوب الحزين
سكنى بين الضلوع نبض الأنين
وإكتبى حكاية جراحك بالدموع
كل صفحة ألف سطر مزنَّقين
مافيش عريس مافيش فرح مافيش ولاد
والحزن جاى من غير معاد



يا عروســـة غنى لحن الآه
حلم بكرة فى الشوارع تاه
وماعادش تانى بين الأمانى
بسمة تنادينا او فرح نستناه
كل اللى سافروا قالوا هانرجع ولا حد عاد
والحزن جاى من غير معاد



يا عروســـة كحلى عيونك دموع
وإطلقى الصرخة اللى مابين الضلوع
وإرجعى من سكــــة الفــــــرحـــة
يا عروســـة ده وقــت الرجـــــوع
كل اللى بيحبوكى ماتوا
عنتر وأبو زيد الهلالى وسندباد
والحزن جاى من غير معاد